جريدة الاضواء الالكترونية
مقالات مشابهة
شعر : سعد الزبيدي ـ ميسان
كلشي بهل وطن ممنوع
كلشي بهل وطن مبيوع
وجه الماتحنه بكاع
باجر لايگول مرايتي الناعور
فك ذمتك بعد ياماي
چفوف الباعتك بالليل فشله وتنغسل بلخور
فشله وماتشوف الگاع ماخذ لونها الناطور
فشله وماتشوف الريح
تغسل ذلة الرايات
بالدم اليعط فوگ الجروح بخور
يمته تنهدك اجروحك
فشله تساوم بروحك
وطن ومرايتك دمك
غشه عيون السيوف الرادت اتذبحك
وطن والبيك همه القررو ذبحك
وطن بس راس اشوفك والشعب رمحك
يمته تفگ غشه اعيونك
روازين الضلم خرسه
ماتسمى ثورة جوع
اذا ماتنتفض هسه
يمته ادروبك الحلوات
تكبر بالعشگ ونسه
يمته اصحه وشوف بوجه الحديثات
مرسوم الفرح عرسه
موكافي الحزن عالبوب
يمته اتهلهل الخنسه
هذا ك انت
الشرب حزنه وسكر بالليش
بلكي يغني محبوبه
وهذاك انت
اللگة عيونه وطن متعوب
ماصله الضوه مرايات تاه بوحشة ذنوبه
وهذاك انت
اليزف ال اه لاخر ديره مشطوبه
وهذاك انت
القره الحيره اعله جدمة
وفاضت دروبه
اهلاه يالشوغتك منك
اهلاه يالحزنك بگدك
خلص عمرك سفر بالريح كل ماتصفن اتهدك
ومادامك نذر للطين
شماورد بعينك نوم چف ذباحك يندهك
ومادامك وطن للنوم
ماتلگه اليفيض من الشعب يختارلك حلمك
حلمك شعبك الضايع
الثوره التبتدي من البار ابد ماتنتهي بجامع
مشه حزنك سوالف خوف والتم شارع بشارع
انت المشتري من الناس
مدري انت الصدگ بايع
چمل حزنك بناسك
شماتصحه ترد وتنام حراسك
وطن خوفك بحراسك
ياشبعان
ياجايع
دورنه ونشدنه وياك
هلبت نلگه بين الناس ثوار وطن ضايع
